توالت الوفود الشعبية صباحاً إلى مكتب النائب البعريني في منطقة المحمرة
توالت الوفود الشعبية صباحاً إلى مكتب النائب البعريني في منطقة المحمرة و من بينهم وفدٌ من مُرِّبي الدواجن و منتجي البيض المحلي و ذلك لايجاد حل لمعاناتهم الاقتصادية، ألا و هي البيض المستورد من الخارج و المنافس لمنتوجاتهم مما يضيف عبءاً إضافيا”عليهم ، واعدًا إياهم بإيجاد حل سريع لهذه المشكلة.
كما تطرّق النائب البعريني لموضوع زيارته لوزير الداخلية قائلاً:
في ثابتة أكيدة بحب ذكر فيها قبل ما نبدأ أيُّ كلام… وليد البعريني لمّا يلتزم بخط ويحط إيدو بإيد شخص لا بيسحب ايدو ولا بينسحب…
هالقاعدة بتعرفوها منيح، ومن هالمنطلق بحب طمن كل حدا عم يحاول يصطاد بالماء العكر، وكل حدا عم يحاول يحلل ويتخيل: أنا ملتزم بخط الشيخ سعد الحريري وما بزيح عن هالخط…
ليش هالكلام؟ لانو في كتار بلشو يحكو انو أنا وعدد من الزملاء بكتلة المستقبل التقينا وزير الداخلية وبالتالي عم نخطط لأمر معين، ويصورو الموضوع كأنو انقلاب على كتلة المستقبل… هالتوصيف خطأ خطأ خطأ!
نحنا صحيح بالمعارضة بس منا بقطيعة مع أي حدا بالبلد، بالعكس التفاهمات يلي الشيخ سعد اعتمدها كنهج بالمرحلة الماضية ودفع حقها كانت لمصلحة البلد على قاعدة التلاقي، وكانت لابعاد الفتنة، وهيدا نهج مكملين فيه…
الأمر الثاني نحنا خارج الحكومة ولكن مش خارج البلد، وبالتالي طبيعي نلتقي أي مسؤول بصفتو الرسمية، لأن نحن منعترف بعمل المؤسسات وما رح نعطلها متل ما قال الشيخ سعد الاثنين الماضي…
وبالتالي منحترم المؤسسات بغض النظر عن الشخص، ونحنا منعرف منيح مبدأ تداول السلطة واستمرارية الحكم، والرئيس رفيق الحريري هوي يلي كتب على مدخل السرايا عبارة: لو دامت لغيرك لما اتصلت اليك…
نحنا أبداً منا من مدرسة التعطيل وشخصنة الأمور وترك البلد رهينة شخص متل ما غيرنا عمل بالسنوات العشرة الاخيرة…
من هون بختم الموضوع هيدا بكلام صريح: نحنا ملتزمين قرارات الشيخ سعد وكتلة المستقبل، والمسؤول يلي لازم نلتقي لنساعد بتأمين حاجات أهلنا ومنطقتنا رح نلتقي بهيدا الهدف، فما حدا يحمل الموضوع أبعاد سياسية، ويلي بدو يكتب ويحلل ينطلق من اليوم ورايح من هيدي الثوابت لما يغلط!
