خواطر بيروتية مساهمة من الصديق الأستاذ مروان جارودي

خواطر بيروتية…

#بقلم_مروان_جارودي

عضو جمعية تراث بيروت…

كنا زغار كتير…

ولما وعِينا عالدني كنت إمنا بعد
إمنا….

ببيوتك وزواريبك كبرنا وربينا …

وتحت ياسميناتك ارتحنا ولعبنا…

وبفياتها غمرتينا….

وياما فرحنا وياما ضحكنا…

ولا مرة غلطتي وزعلتينا…

ولما كبرنا وفهمنا معنى الحب…

بريحة ورداتك وفلاتك باركتينا …

نمشي بامان وناكل بامان وننام بامان…

وانت سهرانة عم تغني وتلوني احلامنا وامانينا….

ولما نبرد … تحني علينا وتدفينا…

وبعده صوت البياعين عم يرندح…

اطيب غزل البنات…
وصل الكرابيج…
وغلاسية يا بوظة…
وكعكات ابو حسين تلعلع بصوته وتشهينا…

وفوالين ومحلات وقهاوي واراكيل وجلسات من البربير للمينا…

لك شو صار يا بيروت…

ماتت إمنا وتركتنا…
لا تموتي انت وتنسينا…..

ولادك حبوك…
ولا مرة نسيوك بس الايام قهرتنا وتحكمت فينا…

مش راح نبكي…
ولا راح نيأس…

لان منعرف…
انو ربنا لا بيتركنا ولا بينسينا…

وإلا ما ترجع بيروت…
تشع نور… وتنشر جمال… وتعود عاشقة البحر وعروسة المينا….

سقى الله ايامك…
ايام الخير يا حبنا ويا بيتنا المربينا….

Text: Mr. Marwan Jaroudi, Beirut Heritage Society.
Photo copyright: Aramco World.