المحافظ بشير خضر ..فضولي..ياريت في تسع نسخ تشبهه
بشير خضر الفضولي توقف….
انت فضولي بتتعدا ع صلاحياتك وبتصول وبتجول اوروبا لتشيل بعلبك عن خريطة المناطق الغير امنة للرعايا الاجانب، انت فضولي بتتعدا ع ميزانية بلدية وبتسحب منها مصاري لتعطيها للفقرا يلي عينن شبعانة بهالظروف الصعبة ومش طالبين غير الخبزة والزيتونة، انت فضولي بتهدد مؤسسات اذا ما تبرعوا بارادتن رح تحط ايدك ع مخازنن المليانة لنشوفن تاني يوم متل الشاطرين عم يتكافلوا لنطلع من هالازمة الصحية، انت فضولي عم تجيب متطوعين طلاب طب يساعدوا بالاشراف ع اعمال التعقيم بمناطقن، انت فضولي بتروح بتطلب من المجتمع الدولي مصاري لتمول مشاريع ببعلبك الهرمل نهار جايبلنا اليات نهار شاحنات نهار مراكز صحية وبرامج تعليمية، انت فضولي بدك تحرر بعلبك وبدك امن وبدك انماء، انت فضولي بدك تفرض عالاعلام يغطي مهرجانات ويفرجي صورة حلوة، انت فضولي بدك من قبل ما الحكومة تعلن حالة طوارىء تسكر محال عاجقة فيها الناس وتعمل مناورات تدرب الدرك فيها كيف يتعاطو مع المصابين، انت فضولي عم تمنع النازحين يروحوا ويجوا بين المناطق وتمنعن يتجوزوا ويعملوا اعراس بالمخيمات، انت فضولي كل ما جينا نعمل عرس بتبعتلنا اشاوس يفضوا العرس ويبعتونا ع بيوتنا، انت فضولي خايف ع صحتنا وع لقمة عيشنا، بدك تطلب منا ننسى البرستيج ونزرع ارضنا بسبب الازمة مش ناقص غير تهددنا تصادرها اذا ما زرعناها، انت فضولي عم تعملنا ملاعب وتقلنا شرفوا عملوا رياضة، مش ناقص غير تفرض علينا غرامة اذا ما انتبهنا ع صحتنا…… ❤️❤️❤️ نيال بعلبك فيك، بسببك بعلبك الهرمل صفر اصابات، يا ريت في تسع نسخ فضولية منك نوزعها ع كل المناطق❤️❤️❤️
