النائب الدكتور إيهاب مطر في إفطار رمضاني – لعودة الحياة إلى طرابلس

شهر رمضان شهر فضيل يجمع كل الناس على الخير
والتسامح
يقرب بين الأخوة والجيران وأولاد المدينة
كلنا نتذكر رمضان بطرابلس بأيام الخير
تقوى ومحبة
هالمدينة يلي بتحمل زكرياتا صور وأحداث حلوة عن طرابلس
بيوت مفتوحة على بعض وقلوب بتعطف ىعلى بعض
بتذكر أبو سمرا كلها حياة الميناء مشعشعة التل والأسواق معجوقة وكل طرابلس فرحانةاما الآن الوضع مختلف
الشوارع معتمة وفاضية الناس مش قادرة تأمن فطور
أو حتى سحور
طرابلس حاليا حزينة
يمكن أيام والمنظومة ظلمت طرابلس
تغيرت معالم كتير بوجهها
بس قلب طرابلس وقلب أهلها بعدو نقي وأبيض
بعدو بينبض بالإيمان بعدو بيحلم بطرابلس أحلا
بيحلم ببيوت ماتوقع على سكانها
بيحلم بشوارع نضيفة وآمنة
بيحلم بشوية مشاريع تأمن لقمة شريفة
بيحلم بمدارس مجهزة مفتوحة للكل
بيحلم يشوف ولاده عميكبره ويأمنو مستقبلن
بيحلم بالكهرباء تنور البيوت والدروب والقلوب
مش لح زيد عليكن
كلنا منعرف اذا بدنا نحكي عن مشاكل طرابلس
ومآسيها يمكن مانخلص قبل ما يخلص رمضان
ولكن دائما منقول الحمد لله
والخير لا بد مايلاقي صحابه
من سنة لهلء يلي قدرنا نعمله أنو بلشنا نغير
اليوم في كتير اشخاص عرفوا مين مسؤول عن إهمال طرابلس
في كتير أشخاص عرفوا مين عمبضحي ومين عميشتغل للبلد وأهله
وكمان عرفوا مين عميشتغل لحالوا ومصالحوا الشخصية
مين عمبحسن أوضاعه بالوقت يلي أوضاع الناس عمتسوء
أكيد طريق الحق صعب
ولكن أعدكم أنه إيدي بإيدكم حتى لو كنا قلال
حنقدر نغير ونرجع طرابلس لأهلها
مؤخراً سمعنا كتير ناس شاطرة بالكلام وتسجيل النقاط
ومحاولة صرف الأنظار عن الحقيقة
ومن بعد عودتي من زيارة لأستراليا
بحب خبركم أنه جولتي وجلساتي مع المغتربين فيها خير لطرابلس
عمنحكي عن مشاريع وخطط تعطي طرابلس مقومات الصمود
وخاصة أنه المغتربين هم الشريان الوحيد لإستمرار اللبنانيين بالصمود
وبقول لكم بعد أكتر من هيك
معظم المغتربين ماعاد عندهم ثقة إلا بالمغتربين من بعد
ماخسروا أموالهم بلبنان وشافوا شو عملت الطبقة السياسية بالبلد
ميشان هيك من واجبي كمغترب أني دعم جسر التواصل وقوي هالعلاقة مع المغتربين
انتقدونا فاشلين والمفلسين
الواحد شو بدو يقول
بهالشهر الفضيل بيسوى نذكرهم بالحديث النبوي الشريف
( من كان يؤمن بالله واليوم الآخر فليقل خيراً أو ليصمت)
بلد من دون جلسات انتخاب رئيس للجمهورية
ومن دون جلسات تشريع
فرحنا للمغتربين بدل مانقعد هون ونبكي على الأطلال ونفقس بيانات ومواقف شعبوية مابتقدم شي لأهلنا بطرابلس ومابتغير الواقع
بالعكس
انا بدعي كل زملائي النواب والحريصين على البلد انو يفكروا كيف بدهم يساعدوا الناس ببلد عميفقد معالم الدولة
حيكون في مواقف لي بهالخصوص قريبا
ومن بعد تأسيس وإطلاق مجموعة إيهاب مطر للتنمية IMD
عمتستمر هالمؤسسة بترك بصمة إيجابية بالمدينة من خلال المشاريع والنشاطات العديدة يلي عمتغطي مختلف القطاعات وعمتتوزع على كل مناطق طرابلس بدون تمييز وعمتوصل لأكبر عدد ممكن من المستفيدين
تركت ال IMD علامة فارقة من خلال حسن الإدارة والتنظيم وعمتستقطب عدد كبير من صبايا وشباب طرابلس يلي حابين يكونوا جزء من مسيرة التغيير بالمدينة
وعدد المتطوعين بال IMD عمبزيد كل يوم
لأنهم بيعرفوا أنه IMD بتشبههم وبتشبه طرابلس
وبالختام بحب أتشكر كل فرد من الكادر الاداري واللوجستي بال IMD موظفين ومتطوعين
بعرف أديه عمتشتغلوا وعمتتعبوا والضغط كبير عليكم
وخاصة أنه حاجات المدينة كتير كبيرة وماحدا بيقدر يحل مطرح الدولة في كتير أشخاص عمتقدر المجهود يلي عمبتبذلوه والتضحيات يلي عمتقوموا فيها
والله يعطيكم ألف العافية
رمضان كريم علينا وعليكم وعلى كل الناس
ان شاء الله بكرا احلا وطرابلس احلا بوجودكم ورضاكم
الله يتقبل صيامكم وقيامكم وجعلني واياكم من الصالحين والسلام عليكم ورحمة الله وبركاته